Aceros Olarra, Grupo Tubos Reunidos, Sidenor, CAFeta Ibredrola enpresek, besteak beste, bat egin dute Espainiak joan den irailaren 19an EBrekin sinatu zuen Ekonomia Zirkularraren aldeko Itunarekin. Egitasmoa Europar Batzordearen 2020ko hazkunderako Europaren Estrategiaren parte da, eta baliabideen erabileran Europa efiziente bat lortzeko bide orrian kokatuta dago. Horrenbestez, erronka da produktuak, materialak eta baliabideak ahalik eta denborarik gehien mantentzea ekonomian, eta hondakinen sorrera ahalik eta gehien murriztea, oinarrian erauzi, ekoitzi, kontsumitu eta botatzea duen ekonomia lineal batetik ekonomia zirkular batera igarotzeko, zeinean materialak produkzio prozesuan sartzen diren. Confebaskek argitaratutako Ingurumen Newsletterrean irakur daitezkeen albisteetako bat da

Confebaskek argitaratu berri duen azken txostenean ikusten denez, Euskadiko enpresa sarearen bilakaera bere horretan mantentzen da. Azaroan, aurreko hilarekin alderatuta, hazkunde txiki bat gertatu da, Euskadin 107 enpresa gehiago erregistratu baitziren Gizarte Segurantzan. Aitzitik, orain dela urtebete bat –iazko azaroa– zeuden konpainien kopuruarekin alderatuta, igoerarik ez dago eta, alderantziz, pixka bat urritu dira: orduan baino 19 enpresa gutxiago daude. Gaur egun, Euskadin inskribatutako konpainiak guztira 59.028 dira. Geldialdi horrek agerian uzten du krisian bizi izandakoaren gogortasuna, eta euskal ekonomiak aurreko urteetan galdutako enpresa sarea berreskuratzeko dituen zailtasunak.

Confebaskeko lehendakari Roberto Larrañagak “Bikain” ziurtagiriak emateko ekitaldian parte hartu du gaur arratsaldean; horien bitartez, eguneroko jardunean euskara maila desberdinetan sartu eta erabili dutela egiaztatu duten enpresak aitortzen ditu, eta aurten guztira 35 enpresa izan dira, horietatik 26 esparru pribatukoak. Ekitaldia Kultura eta Hizkuntza Politikako sailburu Bingen Zupiriak eta Hizkuntza Politikako sailburuorde Miren Dobaranek presiditu dute. Bere mintzaldian Roberto Larrañagak azpimarratu duenez, “zorionez,gure enpresetan, urtez urte, ‘Bikain’ ziurtagiriak finkatzen ari dira; eta hori oso albiste ona da denontzat, baita guretzat ere”.

Confebaskek kanpaina berezi bat abiarazi du gaur Lanbide Heziketako euskal ikasleen eta irakasleen kolektiboa animatzeko eta bultzatzeko Europako Erasmus+ Programan parte hartzeko. Beka sistema bat da, Europako enpresetan praktikak egiteko, eta Confebaskek orain dela 20 urtetik kudeatzen du; dagoeneko LH sistemako 2.000 ikasle baino gehiago baliatu dira deialdiaz, eta, ondorioz, lagundu egin dute Europan Euskadi erreferente bihurtzen, baita ikasleen mugikortasunaren arloan ere. 2017/18 ikasturte honetan, Confebaskek beste 75 beka inguru emango ditu LHko ikasleentzat, atzerriko herrialdeetan, esaterako, Erresuma Batuan, Austrian, Italian, Portugalen eta Frantzian, prestakuntza osa dezaten.

Enpresa Dimentsioari buruz Confebaskek egindako azken buletinean erakusten denez, euskal enpresa ez finantzarioen errentagarritasun ekonomikoa %58,3 murriztu da 2007 eta 2014 bitartean, hau da 4,2 puntu jaitsi da, 2007ko %7,2tik 2014ko %3ra. Eta, jaitsiera horretan, murrizketarik handiena mikroenpresetan gertatu da, euren errentagarritasuna 2007an baino %64,7 gutxiago baita. 2014an, enpresa ez finantzarioen errentagarritasun ekonomikoa %3koa zen, baina mikroenpresek, urte hartan %2,4ko errentagarritasun ekonomikoa izan zuten, 10-49 langile zituzten enpresek (%3,7) eta 50 langile baino gehiagoko enpresek (%3,1) baino askoz gutxiago. Egoera hori, gainera, etengabe gertatzen da urtez urte, eta, ondorioz, errealitate estruktural bat da.